MAELEZO YA KITENGO CHA TEKNOLOJIA YA HABARI NA MAWASILIANO (TEHAMA)
MWAKA WA FEDHA: 2025
Kitengo hiki kina majukumu ya kusimamia utekelezaji wa kazi za Teknolojia ya Habari na Mawasiliano (TEHAMA) ndani ya Halmashauri ya Wilaya ya Longido. Majukumu yake ni pamoja na kuratibu huduma zote za TEHAMA kwa idara zote za Halmashauri pamoja na taasisi nyingine za serikali zilizopo ndani ya Halmashauri kama vile TASAF, Mamlaka ya Maji, Ukaguzi wa Shule, n.k.
MGAWANYIKO WA MAJUKUMU YA KITENGO CHA TEHAMA
Kitengo cha TEHAMA kinatekeleza majukumu yaliyogawanyika katika maeneo yafuatayo:
1. Usimamizi wa Sera, Miongozo na Mipango
Kusimamia utekelezaji wa Sera, Sheria, Kanuni, Taratibu na Miongozo inayohusu TEHAMA kutoka Serikali Kuu.
Kuandaa Mpango Mkakati wa TEHAMA wa Halmashauri.
Kuandaa Miongozo na Taratibu kwa matumizi salama ya Teknolojia ya Habari na Mawasiliano.
2. Matengenezo na Usimamizi wa Miundombinu
Kutengeneza na kutekeleza mpango wa matengenezo ya vifaa vya TEHAMA (Preventive and Corrective Maintenance Plan) kwa mwaka wa fedha husika.
Kutathmini na kusimamia hatari na changamoto kwenye miundombinu ya TEHAMA pamoja na mifumo ya usimamizi wa taarifa.
3. Ushauri wa Kitaaluma na Ujenzi wa Uwezo
Kutoa ushauri kwa Mkurugenzi kuhusu masuala ya TEHAMA na utekelezaji wa dhana ya Serikali Mtandao.
Kufanya tathmini ya mahitaji ya mafunzo kwa watumishi na kuandaa mpango wa kujenga uwezo wa TEHAMA.
Kusimamia na kuratibu kazi za kitaaluma zinazohusu TEHAMA katika Vitengo na Idara mbalimbali.
4. Mifumo ya Habari na Usalama wa Taarifa
Kusimamia na kuboresha mifumo ya taarifa ya Halmashauri pamoja na usimamizi wa usalama wa taarifa.
Kuandaa sera ya TEHAMA ya Halmashauri na kuhakikisha utekelezaji wake unazingatia viwango vya kitaifa.
Kutoa viwango na ushauri juu ya ununuzi, usimikaji na matumizi ya vifaa vya TEHAMA kulingana na miongozo ya serikali.
