MKURUGENZI MTENDAJI AFANYA ZIARA KWENYE MIGODI YA MADINI MUNDARARA.

Posted on: November 27th, 2020

Mkurugenzi Mtendaji wa Halmashauri ya Wilaya ya Longido Dkt Jumaa Mhina  leo tarehe  27/11/2020 amefanya ziara kwenye migodi ya madini eneo la Mundarara, Dkt. Mhina ameambatana na Kaimu Mweka Hazina wilaya ndugu Exaud Mbise,Mwanasheria wa Wilaya ndg.Dominick Luhamvya, Afisa biashara wa Halmashauri  ndg.Parmet na afisa Ardhi wilaya ndg.Masheka,Timu hiyo  imetembelea migodi mbalimbali ukiwemo wa  Shadrack mollel, Mgodi wa Sendeu laizer ,Mgodi wa Kijiji na Mgodi wa Mundarara Rubby .

Dkt Mhina amesema dhumuni kubwa la ziara hiyo ni Kuangalia maendeleo ya Migodi lakini pia kuwakumbusha  juu ya ulipaji wa kodi mbalimbali za serikali iwemo TRA na Halmashauri ambayo ni service levy.Vile vile Dkt Mhina amewataka wamiliki hao wa migodi  kufuata sheria mbalimbali za migodi na usalama na kukumbuka kuhudumia jamii pindi wakipata madini ikiwa ni kuweka ushirikiano mzuri na jamii pia kuwapatia akina mama mabaki ya udongo ili waweze kujikimu kimaisha.

Vile vile  Dkt. Mhina  ametumia ziara hiyo kumpongeza mmiliki wa mgodi wa Sendeu Laizer kwa kupata tani 5.4 za madini  ya Rubby zenye thamani ya bilioni 1.7 na kumtaka pindi atakapouza madini hayo akumbuke kulipa kodi zote za serikali ikiwemo ya TRA na kodi ya huduma ya Halmashauri  lakini pia kuwa na uhusiano mzuri na jamii ya wana Mundarara.