HALMASHAURI YAPATA TUZO YA USHINDI KWA KUSHIKA NAFASI YA 5 KITAIFA MATOKEO YA KIDATO CHA PILI

Posted on: April 2nd, 2019

Na Zaina Mzee

Halmashauri ya Wilaya ya Longido Mkoani Arusha imepokea tuzo ya ushindi kwa  kushika  nafasi ya 5 kitaifa kati ya  Halmashauri na Manispaa 195 kwenye matokeo kidato cha pili kwa mwaka 2018.

Tuzo hiyo imetolewa na Global Education Link na kukabidhiwa kwa Afisa elimu sekondari Mwl.Gerson Mtera kwa niaba ya Mkurugenzi mtendaji wa Halmashauri hiyo. 

Mkurugenzi wa Halmashauri  hiyo Bw. Jumaa Mhina amewapongeza Idara ya Elimu Sekondari wakiongozwa na mkuu wa idara ya Elimu Sekondari  Mwl.Gerson Mtera na Wadau wote wa Elimu  kwa ufundishaji na usimamizi mzuri wa maswala ya Elimu.

Mhina emeeleza kuwa Halmashauri imeweka mikakati ya kuboresha swala la Elimu na kuhakikisha tunabaki nafasi za juu kwenye sekta zote kwani hii ni Longido mpya.

Aidha Mhina ametoa wito kwa jamii na wadau wa elimu Kushiriki kuboresha Sekta ya Elimu hususani katika ujenzi wa Miundombinu (Mabweni, Madarasa, Maabara, Vyoo, Nyumba za Walimu na Ofisi za Walimu)   kwenye Halmashauri hiyo.

Akipokea pongezi kwa niaba ya walimu na wadau wa Elimu, Afisa Elimu Sekondar Mwl.Gerson Mtera amesema, Hii ni hatua kubwa tuliyofikia katika kutoa elimu ya Sekondari na tunajipanga kupata nafasi nzuri zaidi mwaka huu 2019.