LONGIDO YATOA VIPAJI KUUNDA TIMU YA MKOA KWENYE MASHINDANO YA UMISSETA

Posted on: June 6th, 2025

Baada ya kufanyika kwa mashindano ya Umoja wa Michezo ya Shule za Sekondari Tanzania (UMISSETA) ngazi ya wilaya, Wilaya ya Longido imepata wanafunzi mahiri watakaoungana na wenzao kutoka wilaya nyingine kuunda timu ya Mkoa wa Arusha kwa ajili ya kushiriki mashindano ya UMISSETA ngazi ya mkoa.

Mashindano hayo ya ngazi ya wilaya yalifanyika kwa siku kadhaa yakihusisha shule mbalimbali za sekondari kutoka maeneo yote ya Longido, ambapo wanafunzi walishindana katika michezo ya mpira wa miguu, netiboli, mpira wa wavu, riadha na mingineyo.

Akizungumza mara baada ya kutangazwa kwa wachezaji waliochaguliwa, Kaimu Afisa Elimu Sekondari Wilaya ya Longido, Bi. Asha Kivaju, alisema kuwa uchaguzi huo umefanyika kwa kuzingatia vipaji, nidhamu na uwezo wa wachezaji kwa ujumla.“Tumeweza kupata vijana 120 waliothibitisha uwezo wao na sasa watawakilisha Longido katika timu ya mkoa. Hii ni fahari kubwa kwetu kama wilaya kuona mchango wetu unatambulika hadi ngazi ya juu,” alisema Bi. Asha.

Aidha, alitoa wito kwa wazazi, walimu na jamii kwa ujumla kuendelea kuwapa sapoti wanafunzi hao, kwani michezo ni sehemu muhimu ya kukuza vipaji, kujenga nidhamu, kuimarisha afya na kuleta fursa za maendeleo kwa vijana.Wakati huo huo, baadhi ya wanafunzi waliopata nafasi hiyo walieleza furaha yao kwa kuchaguliwa kuwakilisha mkoa na kuahidi kuitumia fursa hiyo vizuri kwa kuonyesha nidhamu, ushindani na uzalendo.

“Ni ndoto yangu siku moja kuvaa jezi ya timu ya taifa, na hii ni hatua muhimu kuelekea huko,” alisema Hassan Mohamed, mmoja wa wanafunzi waliochaguliwa.Mashindano ya UMISSETA ngazi ya Mkoa yanatarajiwa kufanyika kuanzia tarehe 9  mwezi huu katika viwanja vya shule ya Sekondari Ilboru  Arusha, ambapo timu ya mkoa itachaguliwa rasmi kwa ajili ya kuiwakilisha Kanda katika mashindano ya Taifa.