Michezo, Utamaduni na Sanaa

1. UTANGULIZI

Kitengo cha Michezo, Sanaa na Utamaduni ni miongoni mwa vitengo muhimu ndani ya Halmashauri ya Wilaya ya Longido, chenye dhamana ya kusimamia na kuratibu shughuli zote zinazohusiana na maendeleo ya michezo, ukuzaji wa sanaa, pamoja na uhifadhi wa mila na tamaduni za jamii za eneo hili.
Kitengo hiki hufanya kazi kwa kushirikiana na shule, vikundi vya kijamii, asasi za kiraia na wadau mbalimbali kwa lengo la kuibua na kukuza vipaji, kuimarisha mshikamano wa kijamii, na kulinda utambulisho wa kiutamaduni wa wananchi wa Longido.

2. DIRA YA KITENGO

Kuhamasisha na kuwezesha jamii ya Longido kushiriki kikamilifu katika shughuli za michezo, sanaa na utamaduni ili kukuza vipaji, kuimarisha afya, mshikamano wa jamii, na kudumisha urithi wa kitamaduni.

3. MAJUKUMU YA KITENGO

• Kuratibu na kuendeleza shughuli za michezo katika shule na jamii.
• Kusaidia kuanzisha na kuimarisha vikundi vya sanaa na utamaduni.
• Kuandaa na kuratibu shughuli za michezo ya wanafunzi wa shule ya msingi (UMITASHUMTA)shule za sekondari (UMISSETA) na watumishi walio chini ya mamlaka za serikali za mitaa (SHIMISEMITA).
• Kuratibu maadhimisho ya kitaifa na kimkoa yanayohusiana na michezo na utamaduni.
• Kuhamasisha jamii kushiriki katika shughuli za michezo kwa lengo la kuimarisha afya na mshikamano.
• Kutoa elimu kuhusu umuhimu wa kuhifadhi mila, desturi na tamaduni za jamii.
• Kushirikiana na wadau mbalimbali katika kuibua, kukuza na kuendeleza vipaji vya watoto na vijana.
• Kutoa vibali kwa shughuli za michezo, sanaa na burudani ndani ya Halmashauri.
• Kuratibu usajili wa vikundi vya sanaa, vyama vya michezo, vilabu na kumbi za burudani au maonesho ya sanaa.

4. MALENGO YA KITENGO KWA MWAKA WA FEDHA 2025/2026

• Kuwezesha na kuratibu mashindano ya michezo katika ngazi ya shule, kata na wilaya.
• Kuhifadhi, kutunza na kutangaza urithi wa kitamaduni wa jamii ya wafugaji na makabila ya Longido.
• Kuimarisha ushiriki wa wanawake, vijana na watu wenye ulemavu katika shughuli za michezo na sanaa.
• Kuandaa programu za kuibua na kukuza vipaji vya vijana wa Longido kupitia michezo na sanaa.
• Kuweka mazingira wezeshi na rafiki kwa maendeleo ya vipaji katika michezo na sanaa.
• Kuwezesha ushirikiano kati ya Halmashauri na wadau binafsi katika kukuza sekta ya michezo, sanaa na utamaduni.

5. WITO KWA WANANCHI NA WADAU

Halmashauri ya Wilaya ya Longido inawakaribisha wananchi, taasisi na wadau wote kushirikiana kwa dhati katika kukuza vipaji vya michezo na sanaa, na pia kuhifadhi mila na tamaduni zetu kwa manufaa ya kizazi cha sasa na kijacho. Ushirikiano wenu ni msingi wa maendeleo endelevu ya jamii yetu.

6. WATUMISHI WA KITENGO CHA MICHEZO, SANAA NA UTAMADUNI

• Naghenjwa M. Bananga – Kaimu Mkuu wa Sehemu ya Michezo, Sanaa na Utamaduni
• Jesca Bosco Rwezaula – Afisa Maendeleo ya Michezo