WAFUGAJI LONGIDO WAPATIWA MAFUNZO YA UCHAKATAJI NGOZI.

Posted on: April 12th, 2021

Shirika la Utafiti na Maendeleo ya Viwanda Tanzania(TIRDO) kwa kushirikiana na REPOA   leo tarehe 12/04/2021 wamewapatia mafunzo ya uchakataji wa ngozi ya mifugo kwa wafugaji wadogo wadogo wa wilaya ya Longido.

  Akiongea wakati wa ufunguzi wa mafunzo hayo mgeni rasmi ambaye ni Mkuu wa Wilaya ya Longido Mhe. Frank Mwaisumbe amesema wafugaji hawana budi kuhifadhi vizuri mazao yote yatokanayo na mifugo ikiwepo Ngozi, Pembe n.k na amewataka wafugaji kuuza mifugo yao ndani ya nchi ili tusipoteze malighafi zitokanazo na mifugo hiyo lakini pia kuongeza ajira kwa vijana.

Mkurugenzi wa REPOA  aliwaambia wafugaji kwamba ubora wa ngozi  na bidhaa zake unaanza tangu mfugaji anapoanza ufugaji na kuwachanja na kuwakinga na magonjwa yanayoharibu ngozi kama Minyoo pia jinsi wanavyoweka chapa kwenye mifugo lakini pia amewaeleza maeneo mazuri kwa ajili ya chapa kama miguu,nundu,sikio na paji la uso. Vilevile malisho bora ni muhimu maana  mnyama anapokuwa na malisho duni hufanya ngozi yake kukosa thamani.

Wafugaji hao wamefurahia mafunzo hayo na kutaja changamoto yao kubwa ni maeneo ya malisho.