Utawala na Usimamizi wa Rasilimali Watu

Idara ya Utawala na usimamizi wa Rasilimali watu, katika Halmashauri ya Wilaya ya Longido imekuwa kiungo muhimu katika kusimamia rasilimali watu, kuweka mifumo ya utawala bora, na kuhakikisha watumishi wa umma wanatoa huduma bora kwa wananchi kwa kuzingatia maadili ya kazi, ufanisi, na uwajibikaji.

Majukumu Makuu ya Idara ya Utawala na Utumishi

1. Usimamizi wa Rasilimali Watu
   • Kuandaa mahitaji ya ajira kulingana na mahitaji ya idara.
   • Kuendesha mchakato wa ajira mpya kwa mujibu wa kibali kutoka TAMISEMI na Sekretarieti ya Ajira.
   • Kufuatilia maendeleo ya watumishi kazini na kuhifadhi taarifa zao.
2. Kuratibu Mafunzo kwa Watumishi
   • Kuandaa mipango ya mafunzo ya muda mfupi na mrefu.
   • Kufuatilia watumishi waliopo masomoni.
   • Kuwezesha uboreshaji wa taaluma na ufanisi kazini.
3. Kusimamia Nidhamu Kazini
   • Kushughulikia masuala ya kinidhamu ya watumishi kwa mujibu wa Kanuni za Utumishi wa Umma.
   • Kutoa miongozo ya nidhamu, maadili, na uadilifu kazini.
4. Kurahisisha Mawasiliano ya Ndani
   • Kusimamia shughuli za kila siku katika ofisi ya Mkurugenzi.
   • Kuratibu vikao vya menejimenti, baraza la madiwani na vikao vya kamati za kudumu.
5. Usimamizi wa Usalama, Ulinzi na Itifaki
   • Kuratibu shughuli za walinzi wa ofisi.
   • Kuratibu mapokezi ya viongozi wa kitaifa na wageni mbalimbali.
6. Usimamizi wa Ofisi, Nyaraka na Posta
   • Kusimamia mfumo wa mapokezi na usambazaji wa barua.
   • Kuhifadhi kumbukumbu na nyaraka za halmashauri.
   • Kusimamia upokeaji wa vifaa na usafi wa majengo.
7. Kusimamia Uboreshaji wa Mazingira ya Kazi
   • Kuwezesha huduma za usafi, matengenezo ya ofisi, na mazingira rafiki kwa utendaji bora wa kazi.

Seksheni Zilizopo Kwenye Idara ya Utawala na Utumishi

Idara hii imegawanyika katika seksheni kuu nne (4), kila moja ikiwa na majukumu maalum:

1. Seksheni ya Utumishi wa Umma

• Inaratibu ajira mpya, uhamisho, upandishaji vyeo, uthibitisho kazini, na mafao ya kustaafu.
• Inasimamia kanzidata ya taarifa za watumishi (HRMIS).
• Inaratibu tathmini ya utendaji kazi (PEPMIS).

2. Seksheni ya Mafunzo na Maendeleo ya Watumishi

• Inaratibu mipango ya mafunzo ya kitaaluma.
• Inasimamia masomo ya muda mrefu na wa muda mfupi.
• Hutoa vibali vya mafunzo na kuratibu marejeo ya watumishi waliomaliza masomo.

3. Seksheni ya Utawala wa Ofisi

• Inasimamia huduma za kiofisi kama usafi, ulinzi, mapokezi na usambazaji wa nyaraka.
• Inaratibu shughuli za uendeshaji wa ofisi ya mkurugenzi.
• Inahakikisha utunzaji wa nyaraka na vifaa vya ofisi.

4. Seksheni ya Usalama, Itifaki na Mawasiliano ya Ndani

• Inaratibu mapokezi ya viongozi na wageni rasmi.
• Inasimamia itifaki za halmashauri.
• Inashughulikia ulinzi wa majengo ya serikali.