Wakazi wa kata ya Eworendeke na kata za jirani wasogezewa huduma za afya.

Posted on: June 7th, 2018

Ujenzi wa Mradi wa Kituo cha Afya Eworendeke  unaendelea vizuri uko kwenye hatua ya upauaji bati  majengo sita yameshapauliwa.

Majengo hayo ya Maabara,jengo la OPD, jengo la upasuaji ,Mochwari, jengo la kina mama na watoto,na nyumba ya mtumishi yanajengwa kwa kutumia Force Account inayoruhusu  kutumia Local Fundi kwa usimamizi wa Kamati ya Ujenzi ya Kata ya Eworendeke chini ya uangalizi wa Wataalamu Washauri wa idara ya Ujenzi na Kitengo cha Manunuzi Halmashauri ya Longido.

Matumizi ya Force Account yanapunguza gharama za ujenzi kwa kiasi kikubwa ukilinganisha na gharama kubwa za kutumia Wakandarasi wakubwa.

Njia hii pia inawezesha jamii inayozunguka  kwenye eneo la mradi kupata kazi za kujiongezea kipato kwa kuwa fundi mjenzi ni lazima awe mkazi wa wilaya husika pamoja na kushirikisha jamii katika usimamizi wakati wote wa utekelezaji wa mradi.

Ushiriki wa  Kamati ya Ujenzi   ambayo inatokana na wananchi wakazi wa eneo husika inaongeza uwazi na jamii kutambua umuhimu wa mradi pamoja na kujimilikisha mradi kwa kuona kuwa mradi huo ni wao.

Mradi wa Ujenzi wa Kituo cha Afya cha eworendeke  unatekelezwa kwa gharama ya shilingi milioni 700.

Aidha lengo la ujenzi  vituo hivyo vya Afya ni kutoa huduma za haraka na kupunguza vifo vya akina mama wajawazito na watoto chini ya miaka mitano.