Soko la Madini lazinduliwa Longido

Posted on: April 30th, 2019

Halmashauri ya Wilaya ya Longido Leo tarehe 30/4/2019 imetekeleza agizo la Mh Rais wa awamu ya tano Dkt.John Pombe Magufuli kwa kuzindua soko la madini katika eneo la Namanga.

 Akiongea wakati wa uzinduzi wa soko hilo mgeni rasmi ambaye ni Mkuu wa Mkoa wa Arusha Mh.Mrisho Mashaka Gambo amesema , "Soko hili la madini litaondoa adha  mbalimbali walizokuwa wanakutana nazo wafanyabiashara wa madini kwa kusogezewa soko karibu ambapo huduma zote muhimu za kibenki,Usalama zitapatikana masaa 24 lakini pia litawezesha Halmashauri na Serikali kuu kukusanya mapato sehemu moja .

Aidha Mh.Gambo amewataka Mkuu wa wilaya, Mkurugenzi, wataalam kwa upande wa serikali na wauzaji na wanunuzi kuhakikisha soko hilo linaendelezwa.

Kwa upande wake Mkuu wa Wilaya ya Longido  Frank James Mwaisumbe amezitaka mamlaka zote za Madini kufika ofisisini kama kuna kero za aina yeyote zitafutiwe ufumbuzi mara moja na kuwaonya wale wanaowapa vitisho wanunuzi na wauzaji kuacha mara moja.

Naye Mkurugenzi wa Halmashauri ya wilaya ya Longido Jumaa Mhina hakusita kuwaawmbia wadau kuwa ni wakati mzuri wa kufanya biashara na kulipa kodi stahiki kwani ndio njia pekee ya kujiweka karibu na serikali na kufanya biashara salama.