Wafanyakazi Longido waadhimisha sikukuu ya Mosi

Posted on: May 1st, 2019

Wafanyakazi wa Halmashauri ya wilaya ya Longido Leo tarehe 01/5/2019 wameungana na wafanyakazi wote duniani  katika kuadhimisha sikukuu ya Wafanyakazi ambayo inafanyika Mei 1 kila mwaka ,Maadhimisho hayo yamebeba kauli mbiu ya "Tanzania ya Uchumi wa kati inawezekana  wakati wa Mishahara na Maslahi bora ya Wafanyakazi ni sasa" maadhimisho ambayo kitaifa yamefanyika huko jijini Mbeya na mgeni Rasmi akiwa Raisi wa Jamuhuri ya muungano wa Tanzania Dr. John Pombe Joseph Magufuli.

Akipokea maadhimisho hayo katika viwanja vya polisi Longido mapema leo mgeni rasmi ambaye ni Mkuu Wilaya ya Longido  Mh. Frank James Mwaisumbe amesema kuwa Halmashauri ya Longido sasa imepiga hatua kubwa za maendeleo kwa kuanzisha, kuzindua na kuendeleza miradi ya maendeleo.

Mwaisumbe amefafanua kuwa kutokana na Wilaya hiyo kuwa na vyanzo vikubwa viwili ambavyo ni Uhifadhi na Ufugaji imepewa kipaumbele cha kuwa na mradi mkubwa wa Maji kwa sababu shughuli zote hizo zinahitaji maji na kuwa mradi huo unaweza kudumu kwa kutoa huduma stahiki kwa muda wa zaidi ya miaka 25.

Aidha katika kuboresha huduma za jamii serikali tayari imekwishawapatia zaidi ya billion 6.6 katika Afya, zaidi ya billion 7 katika Elimu, wameanzisha kiwanda kikubwa cha kuchakata Nyama na kwa siku kina uwezo wa kuchakata Ng’ombe 200-400 na Mbuzi 800 na kinatarajiwa kutoa ajira kwa zaidi ya watu 400 wakati huo Mai 29, wanatarajia kufungua soko la mifugo la kimataifa. 

 Kwa upande wake Mkurugenzi wa Halmashauri ya Longido Jumaa Mhina amebainisha kuwa sasa longido inaendelea safi kwani kipindi cha nyuma walikuwa wanakusanya takribani million 400 na sasa wanakusanya zaidi ya Billion 1 na wanamatarajio ya kukusanya zaidi ya Billion 2 mwakani.

Naye katibu tawala wa wilaya hiyo Toba Nguvila ameidhinisha kuwa nidhamu imepanda kwa sasa Longido imekuwa tofauti kwa wafanyakazi kwani mwaka huu hawajaondoa mfanyakazi hata mmoja kwa sababu zozote zile.