MH.SABORE AIBUKA KIDEDEA UCHAGUZI WA MWENYEKITI ALAT MKOA WA ARUSHA..

Posted on: October 1st, 2019

Na. Zaina Mzee.

Mheshimiwa Sabore Kennedy Molloimet ameibuka kidedea kwa kuchaguliwa kuwa Mwenyekiti wa ALAT mkoa wa Arusha, Uchaguzi huo umefanyika kwenye  Ukumbi wa Mikutano wa halmashauri ya Arusha.

Akimtangaza Mwenyekiti mpya  wa ALAT mkoa ,Makamu Mwenyekiti ALAT mkoa wa Arusha ambaye ni Meya wa Jiji la Arusha, Mheshimiwa Kalist Lazaro amesema uchaguzi huo umefanyika kwa mujibu wa kanuni za kudumu za mikutano ya uchaguzi wa viongozi wa jumuiya hiyo za mwaka 2009. 

Hivyo amemtangaza Mwenyekiti wa Halmashauri ya Longido,Mheshimiwa Sabore Molloimet kuwa Mwenyekiti wa ALAT mkoa wa Arusha kwa kupata kura 21 za ndio kati ya 22 na kumpa dhamana ya kuwa Mwenyekiti wa ALAT mkoa wa Arusha mpaka  mwaka 2020.

Naye Mwenyekiti mpya wa ALAT mkoa wa Arusha, mheshimiwa Molloimet  amewakushukuru wajumbe kwa kumpa dhamana ya kushika nafasi hiyo lakini pia amewaomba  wajumbe hao, kushirikiana kwa pamoja na kuweka tofauti zao za kiitikadi kwa maslahi mapana ya wananchi waliowachagua na Taifa kwa ujumla.

Aidha Mheshimiwa Mwenyekiti huyo, ameahidi kutumia uwezo alionao,  kusimamia nafasi hiyo kwa haki na kuwataka wajumbe kutimiza wajibu wao pamoja na kuheshimu makubaliano na kusimamia utekelezaji wake.

"Nashukuru kwa kunipa nafasi hii na uwezo ninao, naahidi kuutumia kwa kutenda haki, na zaidi tutumie nafasi zetu kuwahudumia wananchi kwa maslahi ya watanzania"amesema Mwenyekiti  Molloimet

Mheshimiwa Sabore amechukua nafasi iliyoachwa wazi na Mwenyekiti wa Halmashauri ya Karatu,Mheshimiwa Jubilete Mnyenye  aliyepoteza sifa za kuwa Mwenyekiti wa ALAT.