Kansa ya Mlango kizazi tishio kwa wanawake.

Posted on: April 27th, 2018

Saratani  ya mlango  wa kizazi ni ugonjwa ambao umekuwa ukisababisha mateso na vifo vingi kwa wanawake.

Hayo  yamesemwa  leo  tarehe 27/04/2018 na Mkuu wa  wilaya  ya Longido Mh. Daniel G. Chongolo wakati  wa uzinduzi wa chanjo ya kuzuia  saratani ya mlango wa kizazi kwa watoto wenye umri wa miaka 14 na maadhimisho ya wiki ya  chanjo  kiwilaya  yaliyofanyika  Katika kituo  cha Afya Longido.

Mh. Chongolo  amewaasa wasichana   kuacha kujamiiana katika umri mdogo kwani hiyo imekuwa ni moja ya sababu inayochangia  saratani  ya mlango wa kizazi.

Aidha Mh. Chongolo  amewataka  wazazi na walezi  kuhakikisha  wasichana  wote waliofikia umri  wa miaka 14 wanapatiwa chanjo  hiyo ili kuwaepusha na hatari ya kuja kuathiriwa na ugonjwa huo.

Kwa upande wake Kaimu  Mkurugenzi Mtendaji  ambaye pia ni Afisa Elimu Wilaya Ndg. Gerson Mtera amewataka wasichana hao kuwa  wajasiri ili waweze kupata chanjo hiyo na kuwakinga  na madhara  makubwa yanayoweza  kuwapata.

Akitoa maelezo ya chanjo hiyo Mratibu wa huduma ya mama na mtoto Wilaya Ndg. Josiah Mruve amesema walengwa wa chanjo  Kwa mwaka huu wa 2018  ni wasichana wote  waliotimiza  miaka 14, na kwamba kwa wilaya ya Longido matarajio ni kuchanja  wasichana 2,271 kulingana na sensa iliyofanyika Katika shule  zote na katika jamii.

Kwa upande wake mwanafunzi Sara Joel  Laizer amabye amekuwa wa kwanza kupatiwa chanjo hiyo katika wilaya ya Longido ameishukuru serikali kwa kuwajali watoto wa kike na kuona umuhimu wa kutoa chanjo hiyo ili kuwakinga na athari ya saratani hiyo ya mlango wa kizazi.

Amesema wanawake  wengi  wanakufa  Kwa ugonjwa huu  wa Kansa ya mlango  wa  kizazi jambo ambalo lingeachwa liendelee lingekuwa na madhara makubwa kwa jamii.